9 góð ráð fyrir heilbrigðara hár

Þrátt fyrir að erfðir spili stórt hlutverk, þá hafa aðrir þættir einnig áhrif á hárið þitt. Þættir eins og matarræði, veðurfar, mengun og lífsstíll geta allir skipt máli þegar kemur að hárinu þínu og heilbrigði þess.

Hér að neðan eru 9 góð ráð sem hjálpa þér að halda hárinu þínu fallegu og heilbrigðu.

  1. Gættu þess að fá nægju þína af próteini.

Hollt og gott matarræði er mikilvægur partur af því að halda hárinu og hársverðinum heilbrigðu. Hárið þitt er að mestu gert úr próteini og því mikilvægt að fá nóg af próteini til þess að viðhalda eðlilegum vexti þess. Gættu þess að fá daglega um 45 grömm af próteini. Ef þú færð ekki nóg af próteini getur hárið misst styrk sinn og hárlos jafnvel látið á sér kræla.

  1. Zink og aftur Zink.

Zink er steinefni sem spilar lykilhlutverki fyrir hárið þitt. Gættu þess að borða nóg af ávöxtum og grænmeti ásamt kasjú- brasilískum og valhnetum. Þá er hægt að kaupa Zink bætiefni ef þú færð ekki nóg af Zinki úr fæðunni.

  1. Bættu lífsnauðsynlegri fitu við matarræðið þitt.

Omega 3 fitusýrur geta hjálpað þér að halda hársverðinum í góðu standi og þar með gefið hárinu næringu. Hægt er að fá Omega 3 með ýmsum leiðum, s.s. með neyslu á fiski, hnetum og fræjum en auk þess má finna Omega 3 í lýsi og öðrum grænmetisolíum.

  1. Þekktu hárið þitt!

Hár er mismunandi kvenna á milli. Sumar konur eru með fitugt hár á meðan aðrar þurrt. Það er nauðsynlegt að þekkja eigið hár og finna út hvað hentar þínu hári. Sem dæmi, fyrir konur með fitugt hár getur verið gott að nota sjampó reglulega á meðan að þær sem hafa þurrt hár ættu að nota sjampó sjaldnar.

  1. Veldu rétta sjampóið

Sjampó er ekki bara sjampó. Gættu þess að velja rétta tegund sem hentar þínu hári. Oftar en ekki getur starfsfólk á hárgreiðslustofum mælt með réttu sjampói fyrir þig. Mundu þó að dýrasta sjampóið er ekki alltaf besta sjampóið. Þá er einnig góð regla að lesa vandlega á innihaldslýsinguna og gæta þess að sjampóið innihaldi ekki skaðleg efni, svo sem „ammonium lauryl sulfate“ eða „sodium lauryl sulfate“.

  1. Notaðu hárnæringu

Góð hárnæring getur skipt sköpum fyrir hárið þitt. Góð hárnæring getur gefið hári þínu betri fyllingu, mýkt og aukinn glans. Líkt og með sjampóið er mikilvægt að velja hárnæringu sem hentar þínu hári. Skelltu hárnæringu í hárið reglulega, leyfðu henni að bíða í 2-3 mínútur þar til þú þværð hana úr. Þú þarft þó ekki endilega að nota ávallt hárnæringu þegar þú þværð hárið þitt. Reyndu að finna út hvað hentar þér best og fylgdu því.

  1. Farðu hinn gullna meðalveg

Rannsóknir sýna að konur nota gjarnan of mikið sjampó eða nota það á rangan hátt. Það er ágætis regla að þvo hárið ekki oftar en einu sinni á dag. Hafðu það líka hugfast að nota ekki of mikið sjampó og gættu þess að þvo hárið hvorki með of köldu né of heitu vatni. Að lokum skaltu gæta þess að fara varlega með hárið þegar það er blautt.

  1. Forðastu…

Of tíðar hármeðferðir geta hæglega farið illa með hárið þitt. Þá hefur matarræðið einnig sitthvað að segja og best er að forðast óhollt matarræði og áfengi. Þá geta ýmis lyf haft áhrif á hárvöxt, svo sem blóðþrýstings- og hjartalyf sem og þunglyndislyf. Þá spilar lífsstíll þinn einnig sitt hlutverk og of mikil streita, sem dæmi, getur haft áhrif á hárheilsu þína.

  1. Nokkur góð ráð

Önnur góð ráð sem gott er að hafa bakvið eyrað:

  • Þegar þú notar hárblásara, reyndu að byrja á lægsta hita og hækkaðu svo hitann jafnt og þétt.
  • Leyfðu hárinu þínu að þorna með náttúrulegum hætti, eins oft og þú getur.
  • Reyndu að setja hárspennur og teygjur á mismunandi staði.
  • Nuddaðu hársvörðinn
  • Farðu í klippingu
DEILA FRÉTT