5 megrunarráð sem þú ættir að forðast

Í byrjun nýs árs, þegar sykur og salt áti jólahátíðarinnar er nú lokið, hafa margir það markmið að missa nokkur aukakíló. Þetta kallar á breyttan lífsstíl og matarvenjur og því hraðar sem þú vilt missa aukakílóín, þeim mun meiri þörf er á drastískum breytingum.

Það getur hins vegar verið gott að fara ekki of hratt af stað, heldur vanda frekar til verks. Oft á tíðum heyrum við af megrunarkúrum og ráðum sem eru of góð til að vera sönn – og í flestum tilvikum er það reyndin.

Samkvæmt næringarfræðingum er engin ein töfralausn eða megrunarkúr sem hjálpar þér að missa aukakílóin. Megrunarkúrar sem lofa öllu fögru geta oftar en ekki leitt til neikvæðra afleiðinga fyrir líkama þinn. Þeir geta gert þig þreytta/n, bælt niður ónæmiskerfið og hægt á efnaskiptum sem getur leitt til þess að þú munt eiga í meiri erfiðleikum en ella að losa þig við aukakílóin, til framtíðar litið. Þannig upplifir þú sjálfa/n þig ekki uppfulla/n af orku, heldur þvert á móti, þreytta/n og vanmáttuga/n.

Þegar kemur að því að losna við aukakílóin eru engar betri leiðir til en að hreyfa sig og borða holla fæðu. Við hvetjum þig því til þess að láta af öllum pælingum um megrunarkúra, þá sérstaklega þau fimm neðangreindu megrunarráð sem oft á tíðum skjóta niður rótum í huga fólks á þessum árstíma:

 

Megrunarráð 1. „Detox“ megrunarkúrar eru frábærir fyrir líkamann

Rannsóknir hafa á undanförnum árum gefið til kynna að við verðum fyrir áhrifum af skaðlegum efnum í umhverfi okkar á degi hverjum, samanber BPA í plastvörum. Það eru aftur á móti engar haldbærar sannanir fyrir því að vörur sem auglýstar eru sem „detox“ vörur, geti losað okkur við þessi efni úr líkamanum. Besta leiðin til þess að hreinsa út skaðleg efni líkamans er að borða holla fæðu, svo sem baunir, grænmeti og ávexti sem hjálpa lifrinni að hreinsa sig – og drekka nóg vatn til þess að hreinsa nýrun.

 

Megrunarráð 2. Allar kaloríur eru jafnar og hafa sömu áhrif á líkama þinn

Megrunarkúrar sem segja þér að borða ákveðið magn af kaloríum eru oft þannig uppbyggðir að það skiptir ekki máli hvaðan þú færð þessar kaloríur, svo lengi sem þú heldur þig við uppsett magn. Þetta gæti orðið mörgum að falli þar sem stór munur er á kaloríum sem þú færð úr ruslfæði og kaloríum sem þú færð með neyslu á hollri fæðu. Sem dæmi, poki af möndlum sem inniheldur sama kaloríufjölda og poki af snakki, er mun líklegri til þess að veita þér þau næringarefni sem þú þarft, samanborið við snakkpokann. Kaloríur úr mat sem inniheldur holl prótein, fitur og trefjar, veita þér mun meiri seddu og jafnari orku yfir daginn, samanborið við þær kaloríur sem þú færð frá óhollari fæðutegundum. Veldu því að borða hollan mat sem inniheldur góð prótein, fitur og kolvetni, fremur en að telja kaloríur ofan í þig sem þú færð úr óhollri fæðu.

 

Megrunarráð 3. Borðaðu hreina fæðu, alltaf!

Hrein fæða er svo sannarlega hollari en unnar matvörur en það að ætla sér alltaf að borða hreina fæðu getur reynst erfitt. Ef þú hefur lagt það í vana að borða sælgæti, snakk og annan óskunda annað slagið, mun líkami þinn fá vægt sjokk þegar þú ákveður allt í einu að útiloka allt slíkt úr matarræðinu. Á endanum er því hætt við því að þú missir tökin og farir alla leið í sælgætisáti og ruslfæði. Reyndu því að setja þér mörk, ekki taka allt út, heldur finndu góðan meðalveg sem hentar þér. Hægt og rólega getur þú svo minnkað óhollustuna en gættu þess þó að leyfa þér annað slagið eitthvað sem þú þráir að borða.

 

Megrunarráð 4. Taktu út öll kolvetni

Eitt helsta ágreiningsmál næringarráðgjafa og einkaþjálfara undanfarin ár hefur verið hið vinsæla LKL matarræði. Hvort sem þú fylgir því eður ei, þá geta allir verið sammála um það að taka út öll kolvetni er aldrei líklegt til árangurs til lengri tíma litið. Líkami þinn mun vissulega létta af nokkrum kílóum en hægt og rólega fer líkaminn að breyta próteini í glúkósa en próteinið fær líkaminn úr vöðvamassanum og því líklegt að þú glatir vöðvamassa, sem er aldrei gott þegar kemur að langtíma heilsu. Þess í stað skaltu byrja á því að draga úr slæmum kolvetnum, þ.e. kolvetni sem þú færð úr hvítu brauði, sælgæti, kökum og snakki. Bættu þess í stað við góðum kolvetnum úr grænmeti og heilkornum. Það er góð regla að skipta matardisknum upp þannig að helmingur er grænmeti, 1/3 prótein og 1/3 kolvetni úr heilkornum, t.d. sætar kartöflur, hafrar, brún hrísgrjón o.s.fr.

 

Megrunarráð 5. Að hætta að borða glúten er gott fyrir alla

Vissulega getur verið gott að sleppa hveitinu, svo lengi sem þú velur holla og trefjaríka fæðu í staðinn. Að fá sér hnetur, fræ, ávexti og grænmeti í millimál, í stað samloku, er líklegt til árangurs. En það eitt að sleppa því að borða glúten og velja þess í stað glútenlausar vörur, hefur lítil áhrif og getur allt eins leitt til þyngdaraukninar. Glútenlaust kex og brauð er sjaldnast skárra en venjulegt kex og brauð. Það inniheldur oftast sama magn af óæskilegum efnum, svo sem viðbættan sykur, rotvarnarefni og þar fram eftir götunum. Í stað þess að útiloka alla fæðu sem inniheldur glúten skaltu frekar vanda valið þegar kemur að matnum sem þú borðar. Til dæmis, í stað þess að borða hvítt brauð skaltu velja gróft brauð og þar fram eftir götunum.

DEILA FRÉTT